Ul Lun vintin, ul lunvezh amzer vrav, unan eus lunvezhioù kentañ ar bloaz, ul lunvezh dreist evit un distro-skol dreist, ul lunvezh ma oa an holl eürus, ul lunvezh hep labour, ul lunvezh na oa ket tu soñjal kaout gwelloc'h evit kregiñ ar sizhun, ul lunvezh re vat evit ma ne vije c'hoarvezet netra. Setu deuet ar gentel brezhoneg, dres a-raok deomp debriñ hol lein. Ar c'helenner a erruas en hor sal klas, ur sal ken bihan ken ne c'helle den tremen etre hon taolioù. Lezel a reas e sac'h-kein da gouezhañ war an daol, ur sac'h-kein re bounner evit penn-kentañ ar bloavezh. Adalek ar mare-se hon eus komprenet e vefe un dra bennak d'ober, petra ? Kemer a reas un toullad follennoù en e sac'h-kein glas ha ruz, reiñ a reas ar follennoù deomp, skrivet bras warno :
« Penaos sevel un danevell ?, poent kentañ : petra eo an danevelloù ? »

N'hon doa merzet netra c'hoazh, ne ouezemp ket petra en doa c'hoant d'ober gant an dra-se. Ken diroll e oa an holl, ken eürus, ken jourdoul an deiz-se ken ne oa netra evit degas un termen d'al levenez-se. Ur goumoulenn c'hris a dremenas en oabl; talvezout a rae un dra bennak sur a-walc'h, met petra ??? A-daol-trumm e tihunas ac'hanon e-maez ma huñvreoù vakañsoù gant ur vouezh kreñv, ur vouezh ken kreñv m'eo bet klevet gant an holl glasoù e-kichen, ur vouezh o kemenn deomp :
« Setu bremañ, ma bugale, m'emaoc'h en eilvet klas, n'emaoc'h mui er skolaj, bremañ e vo labourioù bras d'ober, a-benn c'hwec'h sizhun ! ». Sioulaat a reas ar c'hlas : ne oa mui a c'hoarzh, aet da get en un taol. Merzet hon doa, e oa echu ar vakañsoù, echu al laouenidigezh hep labour, setu kroget ar skol evit gwir evidomp, deuet ar poent da gregiñ gant labourioù start hag hir betek fin ar bloaz. Talvezout a ra labourioù hir, kalz amzer d'o c'has da-benn : c'hwec'h sizhunvezh a oa bet roet deomp, c'hwec'h sizhunvezh a zistruj. Amzer 'vo : c'hwec'h sizhunvezh a zo hir, amzer zo... a lavaren ouzhin va-unan hep gouzout petra a c'hoarvezfe ganin... AAA, ya !!!

Disoñjet istor an danevell, rak gant al labour hon eus bet war-lerc'h ar souezhadenn-se ne oa mui amzer da soñjal en danevell. O soñjal 'm boa amzer a-walc'h a-benn ar sizhunvezhioù war-lerc'h da sevel an danevell, em boa kemeret ur sizhunvezh sioul a-walc'h, ur sizhunvezh ma voe roet muioc'h-mui a labourioù bras, ha teuliadoù hir a-benn sizhunvezhioù pe ar sizhun war-lerc'h ken. Met c'hoant 'm boa da gaout ur sizhunvezh diwezhañ a ziskuizh, a laouenidigezh, gant va mignoned a-raok labourat evel ul logodenn pennfollet.

Erru an eil sizhunvezh, ha mennozh ebet. Pa lavarin mat : mennozhioù a zeue din met disoñjet e vezent kerkent. Un dra all hon doa da soñjal ennañ er sizhunvezh-se, ul labour bras oa bet roet deomp d'ober war Skiantoù an Natur, un teuliad da sevel; netra da welet gant un danvez lennegel 'ta. Setu me chomet bout el levraoueg a-hed ar Merc'her da labourat war an teuliad skiantoù. Deuet an dibenn-sizhun, ar poent dereat, a-benn neuze evit kaout ur soñj war un istor bennak evit an danevell, met bastegn ! Mennozh ebet; peder sizhunvezh a chome ganin, peder sizhunvezh hir pe verr ???

Kregiñ a reas an trede sizhunvezh gant ul lunvezh ken brav hag an hini hon doa bet pa oa bet roet an danevell d'ober. Setu ar c'helenner o c'houlenn ganimp, fier hag eürus e selloù gant ar soñj da vezañ roet deomp un danevell d'ober :
« Ha neuze, kavet ho peus ur soñj evit hoc'h istor ? » An holl er sal :
« ya, tamm pe damm ». Evidon-me 'vat, mennozh ebet, soñj ebet, met petra 'rin ? Diwar-benn petra e skrivin ? Ret din kaout un istor en dibenn sizhun-mañ. Evel just, bep sizhun e vez roet un teuliad din d'ober, met n'eo ket Doue posubl !!! Kement-se !!! Setu ne c'hellin klask tra ebet evit an danevell er sizhun-mañ, dre fazi un teuliad e galleg diwar-benn ar Grennamzer, un teuliad ken bras ha ken hir ken na vo ret din labourat noz ha deiz en dibenn sizhun-mañ.

Setu boulc'het ar pevare sizhunvezh : an hanter eus ar c'hlas 'zo aet kuit da Gernev-Veur da zañsal : pebezh taol chañs. N'eus ket ezhomm labourat er sizhun-mañ zoken, ha ni ne raimp ket re kennebeut. Setu, kavet hon eus un den speredek el lise : ar c'helenner brezhoneg; daou brantad da gregiñ gant an danevell, da lavaret eo un eurvezh hanter evit hec'h ober. Dreist ! Un tamm mennozh bennak 'zo deuet din, ur soñj skrijus, ur soñj dreist ! Skrivañ diwar-benn ur beleg sioù fall en e gorf, pe c'hoazh diwar-benn lazhadegoù. Setu erru an eil prantad, ha me o vont da gregiñ em c'hreion da vat. Kroget em eus d'ober va sodez avat, d'ober va furlukin dirak ar c'hlas, lakaet on bet er-maez, tost din kaout ur ger war ar c'haier-kenskrivañ gant ar c'helenner brezhoneg. Setu, e-lec'h ar sod e vije bet mat din skrivañ va istor rak aet eo diwar va spered a-benn bremañ ! AAA ! N'on ket ur plac'h gwall fin. Spontus !!! Div sizhunvezh a chom; ur sizhunvezh vakansoù hag ur sizhunvezh skol ! Roit din mennozhioù, ne gavan netra, netra, netra, mennozh ebet, petra 'rin ? Sikourit ac'hanon !

Erru ar sizhunvezh vakañsoù, gellout a rin ober va danevell sioulik : na trouz, na tamm reuz ebet em c'hichen, emaon o vont d'ober war-dro ar babig. Ur soñj am eus kavet zoken, ya, kavet em eus !... Hag ar babig krog da leñvañ, dizehan, ha penn-skañv ac'hanon, setu disoñjet va mennozh ! Met petra 'c'hoarvez ganin ? Met petra 'm eus graet d'an Aotrou Doue da gaout kement-mañ ? N'eo ket gwir, mennozh ebet ken. Setu me en em gavet en un taol fall adarre.

Hag ar skol da adkregiñ war-lerc'h ar sizhunvezh spontus-se : un toullad mat a dud er c'hlas a oa echu o danevell ganto, pe o doa kavet ur soñj da nebeutañ, met evidon-me, netra, soñj ebet, mennozh ebet, Aotrou Doue roit din 'ta ur soñj, panevefe nemet un dra vihan. Pegoulz e rin va danevell, pegoulz e rin va skridaozadenn istor, pegoulz e lennin va saozneg, PEGOULZ ??! A- benn al Lun 13, pa 'm bo kavet ur soñj evit an danevell.

Erru an dibenn-sizhun a-raok ar sizhunvezh spontus a zo da zont, mennozh ebet ! D'ar Sadorn em eus labouret war an istor ha war ar saozneg, met an danevell : netra ! Tamm awen ebet ne zeu din... A-hed ar sulvezh em eus klasket un istor da skrivañ, met hini ebet n'en deus louzet ma follenn. Sul da noz :
« DANEVELL = GWALLHUÑVRE ». Treiñ a rin da sod gant an danevell emaon o paouez skrivañ. Setu ! A-benn ar fin em eus kavet ur mennozh....