Na pegen diaes eo kaout awen ! Met penaos e reont 'ta, tout ar skrivagnerien vrudet-se da gaout danvez d'ober o fezhioù melloù levrioù ? Gwir eo, 'barzh darn anezho n'eus tra diskleriet ebet hag int koll paper, met 'barzh darn all 'z eus traoù memestra ! N'eo ket Doue posubl, me 'zo ma fri dirak ar c'hompoder ha n'ouzon ket petra skrivañ. Ar Sul da noz eo, tro seizh eur nemet kard ha n'em eus skrivet ger c'hoazh eus an danevell a zo da rentañ warc'hoazh... 'Benn un eurvezh e rankin mont da zebriñ, mont dindan ar strinkadenn zour ha mont da gousket. Petra 'rin ? Klask ober 'nezhi memestra, pe kentoc'h kavout un digarez toull ouzhpenn da nompas tapout un notenn laou digant Gwenole ? Moarvat e c'hellfe reiñ un devezh pe zaou, din da echuiñ. Ouzhpenn-se on kazi sur ne vin ket an hini nemetañ da vezañ chomet hep ober ma dever ! Nann ! N'eo ket fur, rak ma rafe e benn mul e vefe brav kaout ur rontig e bann al lennegezh, war rentañ-kont notennoù an trimiziad. Ma, ret eo din kavout ur mennozh neuze. Pelec'h e c'hellfen klask ? Gouzout 'ran : 'barzh al levrioù 'zo war an estajerenn, er burev. War an hent da vont di e vez ma mamm d'an eur-mañ, siwazh, ha rankout a rin tremen buan dirak he fri, rak ne fell ket din bezañ goulennataet diwar-benn stad ma deverioù. Ale, un, daou, tri, aet on. Diskenn gant an diri, erruout 'barzh ar sal vras. Nag a chañs, n'emañ ket ma mamm 'barzh ar gegin o fardañ boued. Gellout a ran mont betek ar burev hep kudenn, met d'an daoulamm memestra. Digeriñ an nor... Forzh ma buhez, 'barzh ar burev 'mañ ! N'em eus ket a choaz, rankout a ran mont e-barzh, hag ober van na vije netra. Ne blij ket din selloù ma mamm, kavout a ran gwelloc'h treiñ ma fenn eget o gouzañv.
« Gwendal, hag echu eo da zanevell ganit ? », emezi.

Kaoc'h-ki ! Ne fell ket din kontañ gevier. Ne c'hellan ket lâret de'i em eus kroget gant an dever arabadus-mañ, pa n'eo ket gwir. Met ret eo din respont memestra, kenkas e tizolofe ar wirionez.

« Deus peseurt danevell emaout o komz ? » (respont gant Gwendal ar Braz, kavet war ar prim...)

« Ma, an danevell Vrezhoneg az poa d'ober a-benn warc'hoazh. Soñj 'm eus ez peus goulennet digant da vreur pehini e oa ar poellad bizskrivañ en doa war e gompoder. »

Ne c'hellan kuzhat netra dezhi, re greñv eo.

« Deuet e oan da glask ur mennozh bennak 'barzh levrioù ar burev. Marteze e c'hellfes reiñ unan din.
- Na petra 'ta ? Ne peus ket kroget ? Erru ar Sul da noz eo e c'houlennez seurt traoù ! Gant ar vezh...
- Gwir eo ez eo un tamm diwezhat, met n'eus ket deuet awen din 'pad ar sizhun a-bezh.
- Petra an diaoul eo an dra-se, an AWEN ? Ne ran ket foutre kaer eus an dra-se, n'eo ket un digarez evidon, nag evit da gelenner. Petra 'ri neuze ? Tremen da nozvezh o vizskrivañ un danevell ha bezañ skuizh o sevel warc'hoazh ? N'out ket sirius tamm ebet gant an afer-mañ, tamm ebet !
- Gouzout a ran.
- N'eo ket trawalc'h gouzout, ret eo ober bremañ.
- Ya, met ne ouezan ket c'hoazh diwar-benn petra skrivañ !...
- Se n'eo ket ma afer. 'Peus ken skrivañ diwar-benn an doare ma 'vez graet war-dro ar chimpanzeed 'barzh Zoo Vincennes, petramant diwar an doare 'zo gant Zavata da zibab e furlukined. Da raktres micherel e c'hellfe servijout dit da zanevell da nebeutañ. Ac'hic'hi ac'hac'ha... » Na pegen laouen e vezit ur wech klevet seurt kaozioù diwar ho penn....

Tostaat a ra tamm-ha-tamm eur ar pred ha n'eus netra nemet ma anv ha danvez an dever war skramm gwenn (ha chomet gwenn) ar c'hompoder. Aes eo da gompren : ne ran ket forzh eus ar chimpanzeed nag eus sirk Zavata ha nebeutoc'h c'hoazh eus ar furlukined.....MA DAN-E-VELL N'EO KET KRO-GET C'HOAZH !!!

Dav din ober un dra bennak memestra. Ouzhpenn-se emaon oc'h en em lakaat klañv gant an istor-mañ. En gwirionez, n'eo ket ken drouk-se Gwenole. Mont a rin da gousket neuze. Dre chañs em eus echuet an holl zeverioù all. Un eur a chomo ganin d'ober anezhi 'barzh an tren warc'hoazh d'ar beure. N'em bo ken 'met kontañ d'ar c'helenner ne oa ket a gompoder ganin er gêr, ha n'em eus ket gellet he bizskrivañ, neuze eo bet graet gant ar bluenn. ....Gant ma vo echu a-raok en em gavout e Brest....

Ale, n'eus ken 'met mont da zebriñ, d'en em c'hlebiañ dindan ar strinkadenn zour, da vezañ anvet gant anvioù marmouzien eus ar re washañ a zo er bed, ha mont da gousket.

Setu amañ danevell ar pezh a c'hoarvez alies gant al liseidi pe gant ar skolajidi p'o devez deverioù d'ober. Da lâret ar wirionez, n'eo ket c'hoarvezet an istor-mañ ganin, en desped d'am anv hoc'h eus lennet meur a wech enni, ha n'eo ket ken drouk-se ma mamm. Memestra e c'hell ma danevell reiñ ur gentel d'an holl studierien a lenno anezhi : an devezh na zeu tamm awen deoc'h, n'ho peus ken met kontañ ho toare da glask danvez, ha sell aze tout.