Ur pok da'm breudeur ha da'm c'hoarezed hag e kuitaan an tamm loch koad hanter-vrein a ro bod din. Nijal a ran eta etrezek va mignoned a zo ouzh va gortoz, da vont da chaseal un tamm preizh. Goude ur frapadig amzer, setu krog mat an droiad chase. Mont a ran buan etrezek enni; hag a-greiz-holl e treuz un trouz iskis, fromus, spontus an egor. Den na gouezh tro-dro din,
« c'hwitet e daol gantañ » a soñjan. Pennfollet an holl memestra; pa ne ouien ket va-unan petra 'oa ret din ober. Hogen, skampet on kuit hep soñjal.

Kaer am eus klask adtapout va c'heneiled, ne zeuan ket a-benn. Ha me da lavaret ouzhin va-unan :
« Ne dalvez ket ar boan ! » Perak mont ken buan ? Me ha mont war c'horrekaat neuze, kement ha klask ur boud bennak mat a-walc'h da gas ganin evit koan. Merzet ar preizh ganin e tagan diouzhtu al loen dievezh. Digor-frank va c'hrabanoù e erruan warnañ. Dirazon emañ al loen madelezhus. Met souezhusat tra, c'hwitet em eus warnañ : a-dreuz din eo tremenet.

Ma, n'eo ket kalz a dra. Poan gof am eus, met evit naon 'vat, n'em eus ket ! Damwelet a ran ur poull-dour en diabell, e-kreiz ur c'helc'hiad gwez-sapr. Nijal a ran war e du. Mont a ran war e c'horre, dour ennañ betek hanter va favioù. Daoublegañ a ran, va figos er poull. Evañ a ran ar muiañ a c'hellan, met stambouc'het n'on ket. Ha kaer am eus lonkañ, ne seblant ket din bezañ evet an disterañ takenn. Ha me o sellet a-dostoc'h, ne welan ket va skeud ! Iskis, ha peadra da gaout aon war un dro. Met n'eo ket un dister dra a seurt-se a chalo ac'hanon, hag e tec'han kuit.

Setu ma nijan etrezek ur c'hoad teñval ha stank. Eno on sur da gavout ul loen bennak. Erru e-kreiz ar c'hoad ez on gronnet gant ur pezh mell tantad. Uhel. Re uhel din, dreist-holl gant ar boan krog da zirañvañ va divaskell a-daol-trumm... Daoubleget an holl loened, o fenn war benn o daoulin, o c'hortoz ar marv da zont d'o c'herc'hat. Liv an anken a welan en o daoulagad. En entremar emaint.
« Va sikour » a glevan e-mesk huchadennoù kriz. Droug a zo ennon. Oc'h en em soñjal emaon pa gouezh dirazon. E gorf teuzet o tivogediñ hag o vont a dammoù war al leur du ha tomm-berv. Ken sklaer eo ar wirionez evidon,...neuze.

N'em eus ken nag an nerzh nag ar c'hoant da dec'hout. M'eo hiziv eo tonket din mervel, e rin hep en em zifenn. Damwelet a ran anezhañ. Aze emañ, o kregiñ ennon. N'em eus droug ebet evel pa ne vije c'hoarvezet netra. Digeriñ a ran va daoulagad gant an aon da welout ar goullo, ar marv. Hag aze dirazon ar priñs-melen o vont da guzhat. Ur sell prim war-dreñv evit gwelout an tan o kenderc'hel gant e labour.

An arvar... Dibab a ran skeiñ war-zu an norz, fiziañs ennon tizhout lec'hioù nevez, an eil re bravoc'h eget ar re all. Goude div vunutenn beaj e veizan emañ an traoù o fiñval buan a gleiz da zehou. Ar gwez en traoñ a zo krommet. An tier en o foull, hag o zoennoù war ar straed. Pikoù du bihan o redek e pep lec'h, pennfollet. Merk an aon a zo sanket don war o fas. Bugale int. Kouezhañ a reont, met den na zeu d'o sikour. Padal emaint oc'h astenn o divrec'h war-zu an dud vras a gerzh warno hep sellet, hag hep kaout keuz. Kompren a ran bremañ ez eus ur gorventenn o tostaat, goustad met diarvar. Hag an dud en oad gour da vervel goude bezañ lazhet daou pe dri bugel o kerzhet warno. Mervel a reont pep hini d'e dro, gwez o kouezhañ warno pe me oar-me. Heug, rukun a sav ennon. An drast-mañ a c'hellan tremen e-biou dezhañ en ur nijal kuit ar buanañ posubl.

Ar gwashañ holl eo n'em eus ket c'hoant. Kaout aon, dizoloiñ santimantoù nevez eo a fell din.
« Deomp de'i » hag e c'hwistan war an hent. Darev eo an diarbenn. Prest on. Ennañ emaon bremañ. Poan benn am eus, droug kein ivez. Met 'tra da welet gant hejadennoù taer ur gorventenn. N'eus efed ebet warnon ur wech c'hoazh. Evel un tasmant on, pe neuze... Ya se eo.

N'eus ken !