Kervarker
 Abaoe 1995 Brezhoneg  ·  Français  ·  English  ·  Español  ·  Deutsch  
Kervarker
· Pennbajenn
· A-zivout

Geriadurioù
· Krennlavarioù
· Anvioù
· Favereau online

Lennegezh
· Danevelloù aes
· Dec'h e vo
· An huñvre dihun
· Da vezañ embannet...

Korn ar vugale
· Diwan Gwengamp 2000

Dec'h e vo
· Danevell 1
· Danevell 2
· Danevell 3
· Danevell 4
· Danevell 5
· Danevell 6
· Danevell 7
· Danevell 8
· Danevell 9
· Danevell 10
· Danevell 11
· Danevell 12
· Danevell 13
· Danevell 14
· Danevell 15
· Danevell 16
· Danevell 17
· Danevell 18
· Danevell 19
· Danevell 20
· Danevell 21
· Danevell 22
· Danevell 23
· Danevell 24
· Danevell 25
· Danevell 26
· Danevell 27
· Danevell 28
· Danevell 29
· Danevell 30
· Danevell 31
· Danevell 32
· Danevell 33

Danevell 30 (live Lennegezh lise)

Muntr e Feunteun-Gleran

e brezhoneg aes

Skrid

Pebezh trouz randonus hini an oto. Eüruzamant ez eus eus ar radio. Tchlak !.. Pouah ! Ar muzik dic'hras-se c'hoazh, hag a blij kement d'ar re yaouank er mareoù-mañ : an tekno pe me-oar-me peseurt sonerezh iskis-all savet war urzhiater... Na vez klevet nemet seurt storlokerezh en deiz a hiziv.

Ma, soñjomp en traoù all, ha lazhomp ar benveg daonet-se. Panevet-se eo brav ar vuhez : brav an amzer hiziv, tomm a rankan lavarout zoken; plijus ma micher ivez, en em c'houlenn a ran gant peseurt afer nevez e vo kroget hiziv... Oh, sell 'ta, war elum emañ ar radio-polis, un afer a bouez hiziv war a seblant !


« Urzh a zo roet d'an holl otoioù polis da vont betek al lec'h anvet Feuteun-Gleran war zu norz kêr » a voe diskleriet gant ur vouezh dous ha plijus, mouezh Kristina, ar benngenurzhierez-polis. Aaa, Kristina, atav gwisket kran ha cheuc'h, gant he daoulagad glas-gwer, don evel ar mor ! Met bliv par d'ur c'hazh yaouank ! Hag hi meleganez ouzhpenn-se. Ur goantenn, par da
« starezed » Hollywood a lavarer ordinal er servij. Met hi d'an nebeutañ n'eo ket ganet e fin ar sizhun. Speredek eo zoken...

E-pad an amzer-se ez on krog da vont davet Feunteun-Gleran. En imor vat on hiziv 'vat : ouzhpenn-se e ouezan ne chomin ket da c'hoari gant paperachoù, un afer a bouez e seblant bezañ.

Ur vrav a gêr eo memestra, gant an iliz-veur he zourioù dantelezhet, hag he straedoù kozh chomet er stad m'emaint dibaoe tan-gwall drastus 1578. Ar straedoù strizh-se, tiez koad a bep tu dezho, eo a laka an douristed da zirediñ amañ bep hañv, siwazh deomp ! En tu-hont da se ez eo ur gêr sioul, ur blijadur bevañ enni.

Berr an hent betek ar feunteun a-benn ar fin. Meur a oto polis all a zo o vont di ivez. N'on ket an hini nemetañ da vezañ klevet ar galv war a seblant. Degouezhout a ran bremañ en un hentig don, a bep tu dezhañ gwez kistin ha gwez derv, meur a gantved dezho. Panevet ma c'harr, peder rod stlejer dezhañ, ne gred ket din em bije gellet treuziñ an hent-mañ. Ar gweturioù all a oa war va lerc'h a zo harzet a-raok mont e-barzh. En gwirionez, poulloù dour a zo e pep lec'h, o vezañ ma oa bet puilh ar glav en noz-mañ; mein a zo e-kreiz an hent a-wechoù zoken. Betek peseurt lec'h didud int bet ouzh hor c'has ?

Un dro bennak e erruan memestra. Meur a zen a zo war al lec'h dija. Ar SAMU, zoken, a zo aze. Amzer din degouezhout ha setu unan eus an archerien o tiredek war va zu dija. Met Favenneg an hini eo ! Ha, n'eo ket cheñchet 'vat. Atav ken lart hag un hoc'h bouetet mat, hag ur penn ejen dezhañ ouzhpenn-se, pebezh meskaj !


« Enseller C'hwiloster, enseller C'hwiloster ! » a hop hemañ neuze gant e vouezh dañvad pennfollet.
« Pellgomzet 'zo bet din evit kemenn e oa deoc'h-c'hwi da gemer penn an traoù. »

Pa lavaren e oa hiziv un devezh dreistordinal.

« Mat, displegit din ar pezh a ouezer neuze. War a seblant oc'h kelaouet mat,a respontan.
- Ya, Aotrou. Bez' e oan oc'h ober ma zroioù er c'harter evel boaz, pa 'm eus gwelet ur peizant pennfollet o tont da gemenn din en doa dizoloet ur c'horf e Feunteun-Gleran, setu goude bezañ gwiriekaet, em eus pellgomzet d'hor c'hreizenn-bolis, ha setu, a zisplegas-eñ en ur glask alies war-lerc'h e c'herioù.
- Hag-eñ e ouezer dija piv eo an hini marv ?
- Ya, mab baroñ Kêrlorc'h, perc'henn-bank pinvidik, e vefe, hervez ul luc'hskeudenn er gazetenn, e-lec'h ma oa kemennet e oa kollet ar roudoù anezhañ.
- Met, ur gwallzarvoud eo, pe... ?
- Ma, deuit da welet pelloc'h. Fonnusoc'h e vo displeget ganin. Ar c'horf a zo c'hoazh el lec'h ma 'm eus e gavet, met ar vedisined a zo o c'hortoz evit e dennañ alese. »

Tostaat a rejomp hon daou neuze eus ar feunteun. Na brav eo evel-se e-kreiz an deiz, skeud ur wezenn faou o romantelaat al lec'h, ouzh e lakaat evel sioul ha didrabas. Ur wir bennoberenn arzel, d'am meno, gant maen kizellet brav ha fin, kizelladurioù rakkristen daoust d'ur groaz kelt bezañ bet lakaet war c'horre, ha skeudenn Sant-Gleran e-barzh. Gant ar c'horf !!! Krenn-enebadur. Ur pik du war ur follenn wenn, Stephen King e-touesk oberennoù Balzac, distresadur ar baradoz ! En ur welet anezhañ evel-se, e c'heller krediñ e oa bet klasket laerezh an delwenn. Saotret e oa al lec'h peoc'hus-mañ.
« Daoust hag e ouezer penaos eo marvet ? », a gendalc'han neuze.


« Ya, pe kentoc'h, krediñ a ra deomp bezañ komprenet. Seblantout a rae deomp er penn-kentañ e oa kouezhet war ur maen, o vezañ ma veze gwelet gwad war unan eus re ar feuteun, ha ma oa gouliet e dal. D'ar mare-se e krede deomp ne oa nemet ur faout. Met goude-se 'm eus merzet en doa bet un taol war e gilpenn... Hag ur medisin en deus merzet ivez en doa fiñvet ar paourkaezh den a-raok kouezhañ en dour, goude an taol. Klozadur kement-se a c'hellfe bezañ : unan bennak, ar muntrer, en doa roet un taol bazh war gilpenn mab baron Kêrlorc'h. Hemañ, badaouet, a zo kouezhet war mein ar feunteun. Ar muntrer a grede e oa marv, setu m'eo tec'het kuit. Met mab ar baron, badaouet nemetken, en deus klasket en em naetaat, met re wan c'hoazh e gwirionez, ez eo kouezhet en dour, e-lec'h m'eo beuzet... » a gont Favenneg gant mil boan.


« Mat, ma komprenan mat eo din da gemer penn an traoù bremañ. Da gentañ penn tennit ar c'horf eus an dour, emaomp o vont d'e studiañ en un doare spisoc'h. », a zivizan.
« Ne ouezer netra evit ar mare, en gwirionez, na perak eo marvet, na gant piv eo bet lazhet, na pegoulz eo marvet... » Setu ma voe tennet ar c'horf eus an dour. Flaer a oa gantañ dija, a-ziwar-se e c'heller klozañ n'eo ket marvet en noz-mañ.


« Emaomp o vont da furchal anezhañ bremañ, marteze e vo kavet warnañ peadra da zisplegañ e varv. » a ginnigan.

Goude ma voe bet furchet an dilhad gant an archerien, e voe kavet kement-mañ : ur mouchouer, un eurier mod-kozh arc'hant kizellet, hag un doug-paperioù a oa ennañ arc'hant, ur sammad brazig e gwirionez pa'z eus ouzhpenn mil lur, paperioù a bep seurt, hag e gartenn-anv. O vezañ ma oan e penn an enklask, e voe goulennet ganin reiñ va ali war ar pezh oa bet kavet :
« Anat eo deomp bremañ n'eo ket bet lazhet evit e arc'hant, » a grogis, fouge ennon da vezañ dizoloet kement-mañ.
« Evit gwir, o vezañ m'emañ tout e arc'hant, hag e eurier prizius gantañ c'hoazh, e c'heller kompren eo evit un abeg all eo bet lazhet. Dre c'houlennata e familh, hag e vignoned, e c'hellimp gouzout marteze ha ne oa ket enebourien dezhañ. Ar c'horf a vo lakaet da vezañ studiet gant ar vedisined, ha labourva an archerdi a sello spis ouzh ar pezh a zo bet kavet gantañ. Me va-unan a raio war-dro e baperioù. Spi am eus e roio kement-mañ un titour bennak, hag e vo diluziet buan ar gudenn-mañ. »

Gwelloc'h eo din mont kuit bremañ, o vezañ m'emañ ar journalisted kentañ oc'h erruout. Ne blij ket din komz ouzh ar mikroioù. Ha forzh penaos em eus traoù d'ober er gêr. Mall 'zo warnon zoken gouzout petra 'zo er paperioù.

Setu me er gêr. Ma-unan e vin, peurrest ar familh o vezañ pe el labour, pe er skol. Tu 'vo din labourat e peoc'h da nebeutañ. Sellomp 'ta petra a 'zo er paperioù a oa gant an hini marv. Mmmmm... mat... ha... dreist !!! Deuet on a-benn, den na c'hello mui prouiñ netra a-enep din. Dleet 'm bije skeiñ kreñvoc'h memestra. Petra 'vefe c'hoarvezet ganin paneve va chañs : Ma ne vije ket marvet ? Ma n'eo ket ganin-me e vije bet lennet ar paperioù ? Den ne c'hello mui kas ac'hanon dirak al lez-varn.

Un den dieub on bremañ !!!

Muntr e Feunteun-Gleran
· Skrid