Holl Gebekiz, pa vez echu ganto o sizhunvezh-labour da Wener da noz, a zered gant o familh a-bezh war-zu hentoù an Norzh, hentoù ar yenijenn. Eno e c'heller huñvreal dibaouez, dirak ar c'hoadoù, noz ha deiz betek ar vunutenn ziwezhañ. Ar vunutenn ma vo ret lakaat keflusker ar wetur da dreiñ ha da loc'hañ. Neuze e vo faoutet kalonoù ar familh evit ur sizhunvezh. Ur sizhunvezh hir a labour hep tamm amzer ebet da fardañ boued mat zoken. Met ne vo ket re spontus ar sizhunvezh-se rak distreiñ a raint davet teñzor peoc'hus an Norzh, davet an ti-koad ken kaer ha ken sioul war vord al lenn, pell diouzh drougiezh ar c'hêrioù bras e-lec'h ma n'eus tamm plas ebet da huñvreal sioulik.

An hevelep soñj a oa deuet d'an Aotrou Johnson ha d'e familh. Ret e oa ober evel ar re all, evel ma oa diouzh ar c'hiz ober, prenañ un ti-koad war-vord ul lenn. Daou-ugent vloaz e oa Charlez Johnson ha ginidik eus ar Stadoù-Unanet. Dimezet e oa gant ur plac'h a orin iwerzhonat, Maureen Lennon hec'h anv, oadet a nav bloaz ha tregont. Honnezh a oa sekretourez en ti Eaton, ar stal vrasañ a zo er C'hebek da werzhañ boued ha dilhad. Dre se e felle dezhi heuliañ spis ar gizioù. Pa ne brene ket an hevelep dour-c'hwez ha Claudia Schiffer ez ae da foll. Ar mab a oa ken droch hag hi, paneve ken nemet gant ar basket. Pa c'hwite war ur match gant ar Chicago Bulls pe pa n'en deveze ket memes bragoù ha Mickael Jordan e troe da sot evel e vamm. Me lavar deoc'h ne veze ket trist ar jeu gant ar familh Johnson pa felle da Vaureen sellet ouzh un diskouezadeg-dilhad ha da Gevin sellet ouzh ur match basket.

Ar verc'h avat a oa kontrol d'ar re all. Ne felle dezhi nemet lenn levrioù prederouriezh pe bezañ koumanantet d'ar gelaouenn Bevet an Natur. Disheñvel e oa diouzh ar re all ha gwisket e veze kentoc'h evel John Lennon. Met un dra a lakae anat e teue eus an hevelep familh : biskoazh n'he doa lakaet he zreid er parkeier nag en Natur. Hag an dra-se e oa huñvre vrasañ Ulalïa.

Bet e oa Charlez oc'h ober e c'houlennoù amprestoù digant an ti-bank. A-du e oa hep kudenn, hag echu leuniañ ar paperioù, setu ma teuas Charlez ha Maureen da vezañ perc'henn war un ti-koad en ul lec'h dianav dezho.

Deuet e oa mare al loc'hañ ganto hag echuet e oa lakaat an holl valizennoù er c'harr, ouzhpenn ar c'hastelodennoù, ar matalasennoù... Leun-kouch e oa break Ford ar Johnsoned ha prest e oa da vont. Lakaat a reas Charlez an alc'houez en toull hag e droad war an droadikell, hag ar c'heflusker da fraoñval par ma c'helle. Klevet e voe un trouz spontus, ha gant ul lamm ez eas ar wetur kuit war-du an hentoù bras. N'ae ket buan met tamm-ha-tamm e tornent hent betek ar gêriadennig. Ne voent ket pell o kavout ar wenodenn da vont betek o zi, met gwashat hent ! Fraoñval, hejañ-dihejañ, fiñval a rae ar wetur hep paouez gant ar stroñs evel ma n'he doa graet biskoazh. Ha digredus e oa an trouz a zeue er-maez diouti. E penn an hent ec'h errujont en o domani nevez, en o zamm baradoz. Kaset e voe ar wetur betek toull dor an ti evit gallout diskargañ anezhi. Prientet e voe pep tra, ar boued, an dilhad, hag all...

Hepdale e voe staliet an dud en ti ha prest ar gweleoù a-benn an noz. Hag aet an holl d'ober tro al liorzh. Kaerat ti bet gwelet ganto betek neuze ! Ar gwez kaer-meurbet, o brankoù o lipat dour klouar al lenn, met un dra all a oa da blijout dezho : ne oa ket an dommerez diouzh ar c'hiz. Ne oa ket un dommerez e gwirionez. Ur siminal e oa ha diaes e oa d'ar paourkaezh tud faoutañ koad d'ober skilhoù da dommañ dezho rak an dra-se ne veze ket graet ganto en kêr.

Goude bezañ debret ez eas an holl da gousket, dre ma ne oa ket gwall aezet en em ziduiñ hep skinwel. Ne gavent netra d'ober, tamm kaoz ebet etrezo. Klasket o doa c'hoari domino met an dra-se ne zeree ket ouzh o oad, setu ma'z eas an holl da gousket pa zeuas an noz. Sioul ha peoc'hus e oa an noz nemet trouzioùigoù bihan ar fubu o tarnijal hag ar gaouenn o kanañ, hag a glever div wech kreñvoc'h pa ne zeu ket ar c'housked d'an den. Evit ar familh Johnson e voe spontus an nozvezh rak ne c'hellas den ebet menel kousket dre ma ne glevent ket trouz ar gweturioù o vont hag o tont gant herr war straedoù Montreal. Re sioul e oa ar c'hoadoù evito. Ken peoc'hus e oa ken e krogas Maureen da vezañ ankeniet, met ne ouie ket gant petra. Bep tro ma teue mare ar c'housked e kroge da grenañ gant an aon. Terriñ a rae penn an holl hep paouez o reiñ urzhioù evit keginañ, evit skubañ... Respont a rae dichek d'he familh ken ma teue an aergelc'h da vezañ displijus. Pep hini o vont eus e du da bourmen, da lenn, met peseurt levrioù... Reoù Ulalïa, reoù a brederouriezh.

Hi, avat, a oa en hec'h aez. Kinklañ a rae an ti gant bleuñv a bep seurt ha gant kurunennoù delioù. Mont a rae da bourmen war ar maez, da zastum flamboez, mouar, lus... Ur blijadur, un dudi e oa eviti.

Seul vuanoc'h e tremene an amzer, seul belloc'h e chome Maureen en he gwele. Klañvidik e oa krog da vezañ hag hep paouez e huche, e yude gant an aon ha gant an dic'hoanag. Dibaouez e kleve ur vouezh izel o c'hervel anezhi d'ar marv. Spontusoc'h-spontusañ e teue da vezañ ken ma tivizas an Johnsoned distreiñ d'ar gêr. Seul belloc'h edo ar wetur diouzh ar gêriadennig, seul greñvoc'h e kleve Maureen mouezh izel un den oc'h huchal :
« Deus ganin davet ar marv, deus ganin davet ar marv, deus ganin... ». Ne zeue ket a-benn an dud d'ober war he zro, ken feuls ma teue da vezañ.

Dont a reas an holl en-dro d'ar gêr met n'ae ket gwelloc'h an traoù gant Maureen, ken na voe kaset anezhi da ospital ar re sot. Bemdez e washae dezhi, ken ne zeue ket he familh da welet anezhi. Betek he marv e klevas mouezh izel an den o c'hervel anezhi d'ar marv ha setu penaos e varvas Maureen gant kleñved ar c'hêrioù bras.