« Me eo, me eo. Mervel a ri, yeo, gwelout a ri 'benn nebeut, nebeut, c'haaaaaaa ! » Aze emaout ? Ya ? Ret eo dit bezañ aze. Klevet ez peus ? Pebezh mouezh divalav emaomp o paouez klevout, neketa ? Perak ez ez kuit ? Heuilh ac'hanon. Na gomzez ket ouzhin, poan-benn am eus. Heuilh ac'hanon. Ha gouzout a rafes e pelec'h emaomp ? Abaoe peur emaomp en trepas-mañ ? Poan-benn am eus. Teñval eo, ha c'hwez fall a zo gant al lec'h-mañ. Plas a-walc'h am eus dres evit tremen. Ne welan netra, ezhomm am eus touch ar mogerioù. Aon am eus. Tachoù lemm o beg a zo ouzh ar mogerioù, poan am eus em bizied. Abaoe eurvezhioù emaomp aze o vale hep paouez. Gwech ebet c'hoazh n'omp troet a-zehou pe a-gleiz, klañv-moñs e vin 'benn nebeut, sur eo. Va-unan-penn emaon, nemet ganit evel-just, met te n'ez out nemet va spered o sikour ac'hanon da vont war-raok. Didrouz pep tra ivez. Ne glever nemet trouz va c'hammedoù. Abalamour da se ne zeuan ket a-benn da gomz a vouezh uhel, kement a aon am eus. Feneant-ki ma'z out, lavar din pep tra : e pelec'h emaomp, petra 'reomp amañ, abaoe pegoulz e valeomp hep ehan ? Chik ! Paouez da gomz ! Ne glevez netra, trouzioù iskis ? Eus a bep lec'h e teuont. Izeloc'h eo bremañ, adkregiñ a ra, trouzioù nevez a zo bremañ, unan anezho o lavarout:
« Mervel a ri ». N'int nemet trouzioù boud evit ar poent. Ne zeuan ket a-benn da c'houzout peseurt trouzioù a glevan. Selaou a rez ? Ne weles netra ? Un tamm gouloù bennak a zo er foñs tout. Deus ganin, deus, marteze ez eo gouloù an diavaez a welomp, redomp, c'hoant am eus mont kuit eus al lec'h-mañ.

Stoket em eus ouzh un nor ? N'ez peus ket bet re a boan ? Ar goulou, pelec'h emañ ar gouloù ? Ezhomm am eus gwelout anezhañ. Poan-benn am eus. Ret eo din digeriñ an nor-mañ diouzhtu. Sikour ac'hanon, mar-plij, n'eo ket aes. Aon az peus ? Perak ? Poan-benn am eus. Na'z pez ket aon. Paouez da glask mont kuit. Gouzout a rez mat ez eo ret dit heuliañ ac'hanon. Ezhomm am eus gwelout ar pezh zo a-dreñv. Ne c'hellan ket ober mod-all. Ne welez ket ez on sachet gant unan bennak treuzwelus da vont e-barzh. Te, hag a wel pep tra, lavar din, piv eo an den-mañ hag a lavar din en-dro:
« Mervel a ri » ? Met komz 'ta ! Na chomez ket difiñv da sellout ouzhin evel pa vijen Satan. Lavar din ! Lavar din ! Poan em divrec'h, poan em daouarn, poan em divhar, poan-benn am eus ! Ret eo din kenderc'hel.

Klask a ran digeriñ an nor, met ne zeuan ket a-benn. Sikour ac'hanon mar-plij. N'ez peus ket c'hoant ? A, setu ! Deuet on a-benn 'benn ar fin. Strebotet em eus. Siwazh din, war va fenn on kouezhet. Muioc'h a boan am eus c'hoazh. Spontus eo. Selaou a rez ? Ne rez ket forzh eus ar pezh a lavaran dit, evel bepred. Trouzioù spontus a glevan en va fenn met didrouz eo al lec'h tro-dro din, war-bouez ar vouezh skrijus o lavarout din c'hoazh:
« Mervel a ri ». C'hoant am bije mervel. Kemer a ran va fenn etre va daouarn, met kement a boan am eus en va daouarn ken na cheñch netra. Ne welan netra. Va Doue, sikourit ac'hanon da heuliañ ar goulou. Ober a rez goap ac'hanon.

Kae dirazon ! Un urzh eo ! Gra ar pezh a lavaran dit ! Forzh penaos, ma n'ez ez ket da gentañ ez in en da blas. Kenderc'hel a ran gant va hent. Ne welan netra nemet ur pik gouloù er foñs tout. Pep tra a dro tro-dro din ha ne rez netra evit va sikour. Ret eo din kenderc'hel. Mar plij, laosk ac'hanon d'henn ober. Paouez da sachañ warnon diouzhtu ! Kenderc'hel a ran. Santout a ran ken kreñv an nerzh ma'z eo ret din redek da gaout nebeutoc'h a boan. Ken du eo al lec'h ma ne welan ket an nor a zo war-lerc'h, hag em eus poan o stokañ outi. Diaes eo din digeriñ an eil dor. Kement a boan em fenn, em divrec'h, em divesker am eus. Pa sachan war an nor e santan va holl eskern o traskal. Digor eo an nor bremañ. Trouzioù, ya trouzioù eo a glevan c'hoazh, n'eo ket mui sioul, didrouz al lec'h-mañ. Aaaaa ! Laboused-mor o skroeñjal, bannieloù o stlakal, bombezennoù o tarzhañ, ar c'hirri-nij o safroniñ hag ar vouezh o lavarout adarre:
« Mervel a ri », hag e c'hoarzh ouzhpenn-se !!! Kemerit holl toull ar mañsoner, me hoc'h asped ! N'ez eus prenestr ebet, den ebet, nemet an trouzioù o lakaat ac'hanon da vezañ sot-nay. War va lerc'h emañ an diaoul, youc'hal a ra warnon, o tostaat emañ ! Heuilh ac'hanon ! Redek, redek, n'ez eus nemet an diskoulm-mañ, redek, redek atav war-zu ar goulou. Na'z pez ket aon ! Da sikour a rin, da wareziñ a rin diouzh ar spered fall, diouzh an diaoul hag a zo tro-dro deomp. Ne c'hellan ket mui redek, unan bennak a zo o herzel ouzhin da vont war-raok. Tremen a ra e zaouarn yen-sklas war va dilhad, war va c'horf. Aon am eus da semplañ, pe gwashoc'h c'hoazh, mervel aze. Pennek ma'z out, sikour ac'hanon da dennañ an daouarn kuit a-ziwar va c'horf. Oc'h analañ emañ e-kichen va divskouarn. C'hwez fall a zo gantañ, ne lavar netra din. Sikour, mar plij ! Va c'homprenet ec'h eus, an hini en deus komzet deomp bremaik eo. Ne c'hell ket bezañ unan all. Va Doue, n'am laoskit ket, mar plij ! Va zad, va mamm, va sikourit ! Mont a ra e zaouarn betek va gouzoug. Kregiñ a ra da stardañ, dousik evit ar poent. Aon am eus mervel. Ha te, aon az peus ? E pelec'h emaout ? Aze ? Ket. Aet out kuit neuze, da Gêrbornig ? Ya, an dra-se eo. Aet out kuit sioul-sibouron gant aon da chom da vervel ganin. Biken ne bardonin an dra-se dit ! Marvet out. Tost echu eo evidon ivez. Houarn eo e zaouarn, yen-du int, evel al lec'h-mañ. Stardañ a ra kreñvoc'h bremañ. Serriñ a ran va daoulagad ken ankeniet on. Kenavo.

Netra, netra. N'en deus graet netra din. Distardet en deus e zaouarn a-ziwar-dro va gouzoug evit laoskel ac'hanon da genderc'hel gant va hent. Iskis eo an dra-se. Abaoe ar penn-kentañ e lavar din e lazho ac'hanon, ha d'ar mare ma c'hell hen ober ne ra netra. Kendalc'homp neuze, hag en ur redek. Gwelout a ran euzhviled e pep lec'h, o klask tapout ac'hanon, met en em zifenn a ran kement ha ma c'hellan. Livioù a bep seurt a zo warno. Met sellout a ran outo an nebeutañ ma c'hellan evit sellout nemetken ouzh ar pik gouloù a zo er foñs atav. Un nerzh kreñv am eus bremañ evit mont a-enep an diaouled-mañ. Mont a ran war-raok, atav war-raok, buanoc'h-buanañ, en ur redek bremañ. Aiou ! Strishoc'h eo an trepas. Ar wech kentañ eo.
« Mervel a ri. » Ar vouezh-se adarre ? N'eo ket posubl kement-se. Ret eo din diwall bremañ peogwir ez eo strishoc'h an trepas. Trouzioù a bep seurt a glevan e-keit ma kendalc'han gant va hent. Kreñv-spontus eo an trouzioù-mañ. Krediñ a ra din e fiñv pep tra tro-dro din evel pa vije ur c'hren-douar nepell ac'han. Poan-benn a zeu din o welout euzhviled o klask tapout ac'hanon ha klevout sonioù ken skiltr ha ken boud war un dro. Va Doue, lak ac'hanon da vezañ bouzar-kloc'h, mar plij ganit ! Diaes eo din bale ken mezv-imobil on. Toulloù a zo e pep lec'h en hent bremañ, a-wechoù ez eo ledan an hent, hag a-wechoù n'eo ket, met ret eo din heuliañ bepred an hent dre ma'z on desachet gant ar gouloù er penn-all. Pa ne welan ket anezhañ em eus aon, dre m'emaon va unan penn hep den ebet, nemet gant euzhviled sot-pitilh. Sed aze, e pelec'h emañ ? Klaskomp en tu kleiz, ya gwelout a ran anezhañ en-dro. Ar wech kentañ eo din treiñ a-gleiz. Iskis eo. Atav e welan ar goulou, un tamm sklêrijenn o tremen etre ar mogerioù pe an dorioù. Treiñ a-gleiz en-dro, ha bremañ a-zehou. Sur a-walc'h emaon tost outañ, ouzh an dieubidigezh, dre ma welan anezhañ brasoc'h-brasañ. Yeo, aze emañ ! Ya, sur eo an dra-se ! Yeo ! Yeo !

Santout a ran emañ ar gouloù a-dreñv an trepas strizh-mañ ! Gwelout a ran mat bannoù an heol o skediñ. Mall 'zo warnon gellout tremen, evit bezañ dieub. Diaes eo tremen memestra. 'Benn ar fin ! Deuet on a-benn ! Ne welan netra, ken splann eo ar goulou. Mouchañ a ran va daoulagad gant va daouarn. Gortoz, gortoz, dousik, bremañ e c'hellan digeriñ va daoulagad. Setu, graet eo. Nann, nann n'eo ket posubl ! Petra am eus graet evit kaout kement-se ? Sikour, sikour !