Emichañs e teuin a-benn da fardañ ar c'hig-yar-se giz Bro-Euskadi, evel ma plij kement da'm mamm. Pell 'zo ne 'm eus ket kemeret amzer da geginañ, abaoe ar pred diwezhañ ma oa bet Kilian ha Mawaïme o tebriñ er gêr. Plijadur hon doa bet en nozvezh-se...

Sellet a ran ouzh ma eurier: seizh eur dija! Poent eo din kregiñ e-barzh e-lec'h chom da hunvreal. Hiziv, er skol zoken, n'on ket bet evit mirout ouzh ma soñjoù da dec'hout kuit. Koulskoude e seblante ar skolidi kaout dudi em c'hentel, met me an hini ne oan ket ganti, ha merzet o deus, sur a-walc'h. Ha gant petra e vezan dedennet er mareoù-mañ, n'eus forzh penaos? Livañ, pe mont da gaout tud a sikour ac'hanon da soñjal nebeutoc'h en afer. Ha koulskoude, poaniañ o klask disoñjal a zo soñjal, atav ha bepred. Mat en deus graet Antoine de La Roche-Marie oc'h aliañ ac'hanon pediñ mamm. Plijadur a raio din kaozeal ganti, abaoe keit-all. Ken dous ha komprenus e vez em c'heñver. Pa oan bihan eo hi c'hoazh a gave an doare da'm frealziñ evit kement kudenn 'oa holl. Gwir eo ivez e oamp tostaet kalz an eil ouzh eben da vare marv tad. Kement hon doa gouzañvet hon-div d'ar poent-se. Ma lelliget he doa diwar neuze, evel un digoll da garantez kollet ma zad, kollet da viken, ha dre ma n'he doa den all ebet da leuniañ he buhez, den all estregedon...

Setu, emañ ar c'hig er forn. Ne chom nemet al legumaj da brientiñ hag e vo prest ar pred. Marteze 'vije dereat din pediñ Jañ-Loui Sanchez da zebriñ un devezh bennak ivez. Ur paotr fentus e seblant din bezañ gant e veg bras hag e zoareoù amjestr. Ouzhpenn-se em befe tro da gomz gantañ diwar danvezioù all estreget al labour hag an istorioù kriz a oar.

« Pelec'h 'ta 'mañ renket ganin ar gontell evit al legumaj? »

Digeriñ a ran an diretenn, met ne welan roud anezhi e neblec'h, daoust d'he liv flamm. Ha me o furchal un tamm pelloc'h e foñs an diretenn, sur ac'hanon ne 'm boa ket laosket anezhi en dar. Alato!? Da biv eo ar gontell-mañ? A-belec'h e teu? Met...n'hec'h anavezan ket!

Kemer a ran anezhi, ha treiñ-distreiñ anezhi e skleur gwenn-distronket ar gouloù neoñ a-us d'an dar, gant ar soñj dizoloiñ, kompren hec'h istor. A dostoc'h ouzh ma fri e verzan eo lous, gwalc'het fall m'eo bet, posupl-tre. Ne denn ket da roudoù boued, koulskoude. Iskisat tra! Ha roudoù gwad sec'h e vefe?

Gwad sec'h!? Gwad chomet da gaoulediñ, da gozhañ, da sec'hiñ e faoutoù bihan an dornell. Gwelet fraezh a ran en-dro skeudenn Kilian astennet en e di. Atav eo bet diaes din gouzañv ar gwad. Penaos e c'hell tud 'zo bezañ ken didruez ha diseblant dirak ar boan? Sur-mat eo muntrer Mawaime ha Kilian un den kriz; douetiñ a ran en deus graet gant binviji a-feson, a-seurt gant ar gontell lemm laonennet hir-mañ. O sellet en-dro ouzh ar gontell e welan un dakennig gwad o tiverañ eus ma biz, gouestad, gouestad. Hag ul liamm 'zo etre ar muntroù hag ar gontell lemm 'zo em daouarn? Kerkoulz all eo gant houmañ, gant ar gontell wadek-mañ en deus graet ar muntrer, ... ha bet eo o tegas anezhi amañ a-benn tamall ac'hanon. Met penaos 'ta en deus graet evit dont tre, prennet ma vez an nor ganin bepred? Ha piv eo? Unan a anavezan? Sur-a-walc'h. Met perak bezañ klasket lakaat bec'h ar muntroù war ma c'hein, pa oa ken anat ar garantez hol liamme hon-tri. Morse n'em befe gellet ober an disterañ poan dezho. Nemet hag ur gemennadenn e vefe a-berzh ar muntrer, da reiñ din da c'houzout emañ war ma lerc'h ivez, o tenesaat ouzhin bep un tammig, ... ha pa droio en e benn klañv, e teuio ma zro din-me ivez? Met evit pe abeg?

Ur c'horfad heug a sav ennon, aon e vefe ar gontellig dister-se an hini he doa distrujet ma Mawaïme garet, an hini he doa troc'het pep roud buhez enni. Hag an abeg nemetañ da'm holl boanioù e vefe? Abalamour d'ar gontell-se em befe kollet ar c'hempouez e oan deuet a-benn da gavout abaoe ur frapad amzer a-drugarez d'ur vignoniezh ken kreñv. Ha peoc'h a adkavin un devezh bennak?

A-greiz pep kreiz e teuan da soñjal er bellgomzadenn he doa bet Mawaïme, an devezh a-raok he drouklazh, gant Marco Rivera, an hini 'zo e penn hor c'hevredigezh e Mec'hiko. War en doa lavaret hemañ e oa bet taget kêriadenn Mawaime gant trafikerien dramm nevez 'zo, kalzik paperioù, dielloù a-bouez a oa aet ganto. Ha gwall ankeniet 'oa he doare en noz-se, pa oa deuet da'm c'haout gant Kilian, ankeniet gant he familh chomet du-hont, gant dazont hor c'hevredigezh, ur gac'hadennig kelien evit kartelioù hollc'halloudus an dramm e gwirionez, met peadra d'o lakaat da rinklañ ha da gouezhañ marteze. D'he soñj e felle d'ar re-mañ diskar hor c'hevredigezh. Daoust ha pouezus eo din savariñ diwar-benn an dra-se gant Sanchez?

N'eo ket sur. Ha fiziañs a c'hellan kaout ennañ c'hoazh? Gant ar pezh eo aet da gontañ da Dereza ar Floc'h diwar ma fenn... Hag-eñ e ra van bezañ dedennet ganin evit tamall ac'hanon pe evit kaout muioc'h a resisadurioù war an afer-se? Iskis e oa Antoine de la Roche-Marie dec'h, selloù iskis en e benn, evel o klask treantiñ ma spered, ken n'ouzon ket mui hag un dra vat eo diskuliañ traoù re bersonel dezhañ, traoù a denn d'an afer-se dreist-holl.

« TUUT...TUUT...TUUT...TUUT.... » Gast! Disoñjet 'm boa e oa chomet ar forn war elum. Devet ar c'hig-yar!! Divizout a ran neuze pellgomz da
« CROC TOUT », ur stal a c'heller prenañ pizzaioù enni, trawalc'h pellgomz, ha degaset e vezont deoc'h.

« Gwelloc'h eo houmañ eget an hini gentañ. Ha gant lipig eo saourusoc'h c'hoazh! »

Atav e vez plijet mamm gant ar spisoù. Ne 'm eus ket keuz da vezañ prenet an daou bizza, a-benn ar fin. Petra an diaoul oan oc'h ober evit bezañ disoñjet ar c'hig-yar? Prederiet gant traoù all sur-a-walc'h. Gant ar gontell moarvat. Petra 'rin gant ar gontell bremañ? Tamallet e vin ma vez kavet amañ. Arabat eo din he skoachañ koulskoude, kenkas e vefe a-bouez evit kavout al lazher: roudoù bizied a c'hellfe bezañ warni. Petra ober neuze? Gant piv e c'hellin kaozeal a-zivout ar gavadenn-se?

« Beuzet en da soñjoù e seblantez bezañ Liza. Ankeniet out gant muntr Mawaime c'hoazh? »

« Siwazh! Diaes eo ma freñv gant an darvoud-se bepred. N'on ket evit mirout a soñjal enni... »

Ha didrubuilh-kaer e chomo ma mamm ma'z an da zisplegañ dezhi ar pezh am eus dizoloet?

Degas a ran an dibenn-pred war an daol ha mont da azezañ en he c'hichen.

« Mamm... »

« Mmmh?... »

« Un dra chalus 'm eus da lavaret dit... »

« Ya, ma merc'h. Prest on da'z skoazellañ. »

« Setu...Pa oan oc'h aozañ ar c'hig-yar, bremaik, an hini 'zo chomet da suilhañ er fornigell, 'm eus dizoloet un dra souezhus en diretenn. Ur gontell n'anavezan ket a oa enni... »

Kenderc'hel a ran da zisplegañ doare ma soñj ha ma anken dezhi. A bep ma'z an gant ma istor ez a an enkrez diouzhin.

« Liza, kompren mat a ran, n'eo ket aes evidout, ha da anken a gomprenan ivez. Met da'm soñj, gwellañ hag onestañ tra d'ober 'zo mont da gaout Sanchez, da zisplegañ fraezh pep tra dezhañ. Bez trec'h war da aon, n'eus tra da rebech dit forzh penaos, ar c'hontrol-bev eo, dañjerus 'vefe derc'hel an holl draoù-se evidout, gouzout mat a ouzez! Ha dav dit anzav eo e labour d'ar Sanchez-se sikour ac'hanout ha diskoulmañ ar gudenn. Ne c'hello ket eñ kavout ar muntrer ma vank titouroù dezhañ. »

« Ar gwir 'zo ganit, Mamm. Atav ez out bet an hini c'houestañ evit aliañ ac'hanon. »

Sevel a ran ha mont da damolodiñ e divrec'h mamm. Daoust d'an digenvez a santan abaoe marv Mawaime em eus komprenet e c'hellan derc'hel darempredoù kreñv gant mamm c'hoazh. Pegen frealzus eo bezañ etre divrec'h unan a garer kalz.

Unnek eur hanter eo. O paouez mont kuit emañ mamm. Aaa, mammig, chalet o welet he merc'hig bloaz-ha-tregont dizimez. Evit c'hoazh avat, 'm eus ket kavet, ken diaes eo bet din atav lakaat kemm etre ar wirionez hag ar roll eo techet pep hini ac'hanomp da c'hoari dirak ar re all. Warc'hoazh vintin atav, ez in da gaout Sanchez. Da lavaret gwir em eus bet soñjet aliezik a-walc'h ennañ en devezhioù tremenet. Marteze eo abalamour ma'z on gwanaet er mareoù-mañ ha ma plij din gouzout ez eus unan bennak em c'hichen gouest da'm c'hompren. Dedennus e seblant ar paotr-se bezañ.

Diwiskañ a ran, mall warnon gourvez war ma gwele da vont gant ar c'housked. Ha dont a rin a-benn da zieubiñ ma empenn, da zistegnañ ma nervennoù, goude un hir hag ankenius a zevezh? Daoust ha talvezout a ra ar boan din kenderc'hel da vevañ ma vez ret gouzañv atav? N'eo ket reizh ar bed-mañ! Ha bet eo bet un dro bennak? Deomp-ni da glask e wellaat, marteze. Kavet 'm boa unan am boa darempredoù dispar ganti, asambles e labouremp davet ur pal gwirion. Marteze e vefe mat din kenderc'hel gant ar stourm ken tost da Vawaime. Difenn an Indianed a vefe un doare da zerc'hel koun anezhi.

Un eur vintin eo dija, ha n'eo ket deuet an hun c'hoazh. Advevañ a ran dizehan darvoudoù poanius ar sizhunvezhioù tremenet. Diaes e vo din adkavout ar peoc'h keit ha ma ne vo ket sklaeraet an traoù ha dizoloet ar muntrer.