Kervarker
 Abaoe 1995 Brezhoneg  ·  Français  ·  English  ·  Español  ·  Deutsch  
Kervarker
· Home
· About
· FAQ

Learn !
· Online course
· Useful phrases
· Easy short stories

Dictionaries and grammars
· Little grammar
· Breton names
· Favereau online

History
· What is Breton?

Danevelloù aes
· Danevell 1
· Danevell 2
· Danevell 3
· Danevell 4
· Danevell 5
· Danevell 6
· Danevell 7
· Danevell 8
· Danevell 9
· Danevell 10

Danevell 8 (live #)

Dial

e brezhoneg aes

Skrid

Ma mignon Kerloc'h-Omnes, an enklasker brudet, a oa ganin en devezh all o tebriñ ur pizza yen en ur c'hrampouezhti e kreiz-kêr pa lavaras en ur lenn ar gazetenn : « Sed a zo souezhus, Gwazhdon.
- Petra zo souezhus ? emezon en ur deurel ur sell heuget ouzh ar moc'haj em asied
- Sellit, doktor » emezañ en ur ziskouez din ar gemennadenn, ha kregiñ da zebriñ gant plijadur an dra doñjerus a oa dirakañ. Ur c'harr-tan Mercedes a oa bet lakaet e gwerzh, hag ar priz warnañ ne oa nemet kant lur. Kant lur gall nemetken. Kenkent hag echu gantañ e asiedad, ha ma hini ouzhpenn, paeet ganin boued fall ha gwin trenk hon daou bred, ez eas Kerloc'h-Omnes da bellgomz d'hon mignon Steven Pilgerc'h a oa o klask ur Mercedes kozh evit ur film nevez.

Hag ar filmaozer ha mont da welout ar c'harr e ti an hini en doa laket e werzhañ. Ur vaouez e oa, daou-ugent vloaz bennak dezhi, gwisket kran, rak evel ma c'hallit krediñ ne oa ket eus ar re baourañ.
« Ma c'harr-me n'eo ket, emezi, rak d'am gwaz eo. Met lavarout a c'hallan n'eo ket ur farsadenn tamm ebet. Deuit ganin da welout. » Pa voent dirak ar c'harr e welas ur c'harr glas-lufr, kozh a dra sur, a gouste tri c'hant mil lur d'an nebeutañ. Diouzh e welout e oa bet prenet daou vloaz a-raok, met servijout n'en doa ket graet kalz. « Iskis e kavan an afer, eme Bilgerc'h. Sur oc'h n'eus fazi ebet eus ho perzh ? Deuet e oan da welout ur c'harr a werzhit kant lur, hervez ar gazetenn.
- Fazi ebet, eme ar vaouez. Sed amañ ar paperioù hag ar c'harr, ma roit din ar priz a c'houlennan. »

Nec'het e oa ar filmaozour, un den onest evel n'eus ket kalz, o welout pegen nebeut a c'houlenne, ha nac'h a reas da gentañ. Met pennekoc'h egetañ e oa ar vaouez.

« Gant ma Mercedes damnevez on deuet da welout ac'hanoc'h, eme Bilgerc'h da Gerloc'h-Omnes, a oa nevez krog da c'hoari echedoù ganin. Gallout a rit e welout dre ar prenestr. Aze emañ e korn ar straed. Sed un istor a c'hallfe plijout deoc'h, Kerloc'h. Soñjit 'ta! Aet eo kuit he gwaz gant ur vaouez all da Vro-Brazil. Ha petra en deus graet ar genaoueg-se, nemet skrivañ dezhi da c'houlenn diganti gwerzhañ e garr. Ha kas an arc'hant dezhañ du-hont.
- Ha graet he deus, evel just, eme Gerloc'h-Omnes.
- Hep mar ebet, eme e vignon.
- Laouen e vo egile gant e gant lur. Gallout a rafes ober ur film gant an istor-se.
- Setu dres pezh am boa soñjet. "Dial gwreg", e vo e anv. Un istor polis e vo. Ezhomm am bo ac'hanoc'h.
- Pa garot, eme Gerloc'h-Omnes. Koll oc'h adarre, Gwazhdon, ma mignon kaezh. C'hwi a baeo ar pred a-benn arc'hoazh. » Chom a raen da sellout ouzh ar c'hoari. Heuget e oan. Pa soñjen em boa paeet kant lur daou bizza yen en deiz all.

Dial
· Skrid
· Goulennoù