Ma mignon Kerloc'h-Omnes, an
enklasker brudet, a oa ganin en devezh all o tebriñ ur pizza yen en ur
c'hrampouezhti e kreiz-kêr, pa lavaras en ur lenn ar gazetenn:
« Sed a zo souezhus, Gwazhdon.
-Petra zo souezhus? emezon en ur
deurel ur sell heuget ouzh ar moc'haj em asied.
-Sellit, doktor », emezañ en ur
ziskouez din ar gemennadenn.
Ha me da lenn, e keit ma oa-eñ o tebriñ
gant plijadur an dra doñjerus a oa bet lakaet dirakañ.
Ur c'harr-tan Mercedes a oa bet
lakaet e gwerzh, hag ar priz warnañ a oa kant lur. Kant lur gall nemetken.
Kenkent hag echu gantañ e asiedad,
ha ma hini ouzhpenn, paeet ganin boued fall ha gwin trenk hon daou bred, ez eas
Kerloc'h-Omnes da bellgomz d'hon mignon Steven Pilgerc'h a oa o klask ur
Mercedes kozh evit ur film nevez.
Hag ar filmaozer ha mont da welout
ar c'harr e ti an hini en doa laket e werzhañ.
Ur vaouez e oa, daou-ugent vloaz
bennak dezhi, gwisket kran, rak evel ma c'hallit krediñ ne oa ket eus ar re
baourañ.
« Ma c'harr-me n'eo ket, emezi.
D'am gwaz eo hennezh. Met lavarout a c'hallan n'eo ket ur farsadenn tamm ebet.
Deuit ganin da welout."
Pa voe digoret dezhañ ar c’harrdi e
chomas da sellout ouzh ar c'harr glas-lufr, unan nevez diouzh e welout, hag a
gouste tri c'hant mil lur d'an nebeutañ.
« Prenet eo bet daou vloaz zo,
met ruilhal n'en deus ket graet kalz.
-Iskis e kavan an afer, eme
Bilgerc'h. Sur oc'h n'eus fazi ebet eus ho perzh? Deuet e oan da welout
ur c'harr a werzhit kant lur, hervez ar gazetenn.
-Fazi ebet, eme ar vaouez. Sed amañ
ar paperioù hag an alc’hwezioù, ma roit din ar priz a c'houlennan. »
Nec'het e oa ar filmaozer, un den
onest evel n'eus ket kalz, o welout pegen nebeut a c'houlenne, ha nac'h a reas
da gentañ. Met pennekoc'h egetañ e oa ar vaouez.
« Gant ma Mercedes nevez eta on
deuet da welout ac'hanoc'h », eme Bilgerc'h da Gerloc'h-Omnes, a oa nevez
krog da c'hoari echedoù ganin. « Gallout a rit sellout dre ar prenestr:
aze emañ, e korn ar straed. Sed un istor
a c'hallfe plijout deoc'h, Kerloc'h. Soñjit 'ta! Aet eo kuit he gwaz
gant ur vaouez all da Vro-Vrazil. Ha petra en deus graet ar genaoueg-se, nemet
skrivañ dezhi da c'houlenn diganti gwerzhañ e garr. Ha kas an arc'hant dezhañ
du-hont.
-Ha graet he deus, evel just,
eme Gerloc'h-Omnes.
-Hep mar ebet, » eme e vignon.
-Laouen e vo egile gant e gant lur.
Gallout a rafes ober ur film gant an istor-se. »
-Setu dres pezh am boa soñjet. Dial gwreg, e vo e anv. Un istor polis e
vo. Ezhomm am bo ac'hanoc'h.
-Pa garot, eme Gerloc'h-Omnes. Koll
oc'h adarre, Gwazhdon, ma mignon kaezh. C'hwi a baeo ar pred a-benn arc'hoazh.
Chom a raen da sellout ouzh ar
c'hoari. Heuget e oan.
Kant lur!
Priz daou bizza yen an deiz all.
GOULENNOÙ
1. Piv eo tud an istor-mañ?
2. Pelec'h e krog an istor?
Pelec'h ez echu?
3. Petra a goust kant lur?
4. Eus peseurt gwreg ez eus
kaoz en titl? Petra he deus graet? Perak?
GERIAOUEG
brudet:
célèbre
dial:
vengeance
doñjerus:
écoeurant
dres:
juste
echedoù:
echecs
egile:
l'autre
e-keit
ma: pendant que
enklasker:
enquêteur
filmaozer:
réalisateur
genaoueg:
imbécile
gwerzh:
vente; -añ: vendre
hervez:
selon
heuget:
écoeuré
iskis:
bizarre
kas:
envoyer
kemennadenn*:
annonce
koll:
perdre; perdant
krampouezhti:
crêperie
kran:
chic
lufr:
poli, brillant
mar:
doute
moc'haj:
cochonnerie
nec'het:
inquiet
nemet:
sinon
nemetken:
seulement
pennek:
têtu
perzh:
part
pred:
repas
priz:
prix
ruilhal:
rouler
sell:
regard
souezhus:
étonnant
teurel
(taol):jeter
trenk:
aigre