VAKANSOU EN EUSKADI
E vakansoù e oamp, ma mignonez ha
me, e miz Eost diwezhan. Abaoe pell dija e oamp e sell da vont da weladennin
Bro-Euskadi, ha setu perak hor boa dibabet tremen hor vakansoù eno.
Da gentan e oamp en em staliet en ur
gêriadenn vihan, brudet-tre, anvet "Espélette" e galleg, hag
"Ezpeleta" en euskareg. Kavet hor boa, en-dro d'ar gêriadenn, un
atant war ar maez, ur park en e gichen ha savet hon teltenn warnan. Pegen brav
e oa al lec'h, me'lâr deoc'h! Sonjit 'ta! En-dro deomp ne oa nemet menezioù,
parkeier e-leizh, glasvez, ur wazh vihan o redek aman hag ahont, denved ha
saout o peurin tro-war-dro. E-kreiz ar c'horn-bro-se e oa staliet atant an dud
a veve aze a rummad da rummad. Buan hor boa kejet gant an dud a zalc'he an
ti-feurm. Ar wech kentan e oa deomp ober anaoudegezh gant Euskariz hag a ouie
holl euskareg a-vihanik ouzhpenn-se! Ul lodenn vras e oa eus ar pezh a glaskemp
aman. Plijet e oant ivez o komz gant Bretoned evel ma'z omp, ma mignonez bet
ganet e Roazhon, ha me bet ganet e Lehon e-kichen Dinan. Tamm-ha-tamm hor boe
tro da liamman darempredoù ganto, da zeskin o yezh, da zizolein o buhez hag o
c'hudennoù ivez.
Bez' e oa ivez ar gêriadenn,
"Ezpeleta" evel ma vez graet outi gant an Euskariz ; ul lec'h brav a
zo anezhi, gant ur c'hastell kozh en ur giz euskarat, hag ivez gant un iliz,
dishenvel-krenn diouzh ar re a vez kavet e Breizh, ha savet ur vered en-dro
dezhi. Evel just e oa kalz a draoù all plijusoc'h : ar pimant da skouer,
istribilhet ouzh mogerioù an tiez, ar pezh a ro livioù splann d'ar gêriadenn
d'an hanv.
A-hend all hor boa gweladennet
kêrioù all : St-Jean-De-Port, Aïnhoa, Souraïde, St-Jean-De-Luz war an aod da
skouer e-touez ar re anavezetan ... Met ar re a blije deomp ar muian a oa ar
c'hêriadennoù er menezioù. Ya, mont da vale war ar gwenodennoù a roe kalz a
blijadur deomp. Kalz denved a oa, ha kalz a gezeg gouez ivez. Estlammet e oamp
bet o welout anezho en o frankiz, o c'haloupat er parkeier, den ebet da zifenn
outo da vont e-lec'h m'o doa c'hoant. "Pottok" ['p ti k] a vez graet
outo gant an Euskariz ; kezeg pennek, frank ha bihan a zo anezho ivez, boazet
da vevan o-unan er menezioù, kustum ouzh an amzer rust a vez er vro-se.
A-benn ar fin hor boa lezet ar
c'hezeg, an denved, ar menezioù hag an Euskariz da zistrein da Vreizh,
skeudennoù e-leizh en hor penn, kalz a istorioù ganeomp da zezrevell d'ar re
all, keuz ganeomp o kuitaat ul lec'h ken brav, ken plijus, ken sioul, met plijet-kenan
o vezan dizoloet ur vro, ur bobl hag ur yezh.
Mat, evit echuin ma danevell vihan e
fell din kontan deoc'h perak e kavan ken plijus ar vakansoù. Da gentan peogwir
int vakansoù just a-walc'h, da lavarout eo n'eus sousi ebet da gaout.N'eus
nemet sonjal en traoù a blijfe deomp ober. Tu a zo deomp hunvreal neuze, tu a
zo deomp diskuizhan en ur zizolein traoù nevez na anavezemp ket betek-henn.
Kalz a zorojoù a zo digor d'an dud, ha n'o deus nemet dibab unan ha kemer penn
an hent da vezan kaset d'o flijadur.