Gallaoeg, brezhoneg hag an dazont.

Foromoù kozh

· 1999-2001
· 2001-2002

kenskriva

Gallaoeg, brezhoneg hag an dazont.

1999-2001

Gallaoeg, brezhoneg hag an dazont.
Tangi I.Strogell, 2000-04-15 19:19:22

Setu brezhoneger yaouank on hag un nebeut goulennoù 'meus?
1.Peseurt plas evit ar gallaoeg e Breizh a-vremañ hag evit arc'hoarzh?Trefoedach (Evel ar brezhoneg komzet e-giz ma vez laret gant broadelourien zo),eil yezh vroadel evit tud all kar-o-bro,yezh rannvroel.
2.Mod all peseurt sevenadur brezhonek?Gwir eo ne vez kavet nemet nazied,faskourien e-touez an dud a ra war-dro ar brezhoneg da skouer Goulven Pennaod, Yann-Ber Tillenon h.a.P3etra ober gant skrivagnerien a vez livet evel pennoù-faskour. Sonjal a ran e R.Hemon, Langleiz pe Youennn Drezen o deus bet komzoù enepyuzevek spontus. Gwir eo e oant tud ur maread, ur gevredigezh hini kornog Europa ha ne oa ket bet gwall blijus evit ar Yuzevien.
Met,klask a reomp lakaat ar brezhoneg da vont war-raok ha n'eo ket aes gant ar pezh o deus skrivet ar re-se(ne gaozan ket eus o labourioù lennegel pe yezhoniel).Ur gudenn eo evidon-me ha plijet e rafe din diskoulmañ anezhañ e-keit ma vez tud o kanmeuliñ ar re am meus menneget a-us.
3.An dud-se just a-walc'h o deus digoret dorioù nevez d'al lennnegezh vrezhonek ha laket odeus ar brezhoneg da "frekentiñ" tachenoù nevez.Bremañ e kav din eo re liammmet ar brezhoneg ouzh Breizh.Ne vefe ket
mat distagañ an eil deus egile.Ar bed dre ar brezhoneg...Evit gwir,aet on skuizh gant an envorennoù(s.o. danvez brasañ ar gelaouenn Brud Nevez...)
4.petra e vo distagadur ar brezhoneg warc'hoazh?Unan par d'an hini gallek?Tud zo n'int ket evit lakaat mat an tao-mouezh,en-o-zouez Per Denez.Dipitus bras evit ur c'helenner war ar brezhoneg,ur stourmer bras hag ur skrivagner.
Mersi bras deoc'h tout

RE: Gallaoeg, brezhoneg hag an dazont.
Gwenael, 2000-04-15 21:08:22

Tangi I.Strogell a skrivas:
-------------------------------1.Peseurt plas evit ar gallaoeg e Breizh a-vremañ hag evit arc'hoarzh?Trefoedach (Evel ar brezhoneg komzet e-giz ma vez laret gant broadelourien zo),eil yezh vroadel evit tud all kar-o-bro,yezh rannvroel.
Respont: Siwazh n'eo ket bet gouest paotred ar gallo da ober deus o parlant ur gwir yezh reizhekaet. Evidon-me ez eo un tammig touellus ivez komz deus ar gallo evel ur yezh a glotfe (pebezh burzhud!) gant bevennoù Breizh-Uhel. Mes ar gallo en deus e blas e Breizh-Uhel, muioc'h evit ar brezhoneg, evidon-me.
2.Mod all peseurt sevenadur brezhonek?
Respont:Komz a rez deus Goulven Pennaod e-giz pa 'n dije ul levezon bras war an Emsav. GP zo un den gouiziek-tre, un den a skiant mes n'eo ket ur politikour. Ar brasañ istim am eus evit al lenneg; Yann-Ber Tilenon? Pell zo m'eus ket klevet komz deusoutañ. Petra eo deuet da vezañ? Evit a sell ouzh Roparz Hemon, h.a., hon eus-ni brezhonegerien ar bloavezh 2000 ur bras a zle en o c'heñver.

A galon,
Gwenael

RE: Gallaoeg, brezhoneg hag an dazont.
Yann-Fañch, 2000-04-25 00:23:06

Skrivet en deus Gwenael :
"Evit a sell ouzh Roparz Hemon, h.a., hon eus-ni brezhonegerien ar bloavezh 2000 ur
bras a zle en o c'heñver."

Re verr ha re aes e kavan da respont, Gwenael, ha re bar da respont "ofisiel" an emsav.
Gwir eo hon eus ur bras a zle e-keñver R. Hemon, Y. Drezenn hag ar re-all.
Gwir eo o deus skrivet ha graet ur bern traoù a-bouez evit Breizh hag ar brezhoneg.
Gwir eo ivez n'int ket didammal e-keñver o emzalc'h a-raok hag e-pad ar brezel.
D'am soñj eo re dechet an emzav da devel traoù zo ha da zismegansiñ hep respont ar re a dag ac'hanomp war an dachenn-se.
Me 'gav dipitus bezañ rediet da lenn pennadoù ha levrioù hon enebourien evit anavezout gwirionezoù zo.
Diwar-benn Y. Drezenn, da skouer, ne gavan e-barzh kelaouennoù an emsav, da vare e gantved deiz-ha-bloaz, nemet meuleudi, azeulerezh, liderezh. Ger ebet diwar-benn e skridoù e-barzh ar gelaouenn "Arvor" da-skouer.
Ur fazi bras eo lezel an dachenn-se d'hon enebourien. Er c'hontrol e vefe enor an emsav komz disaon ha divezh eus ar prantad-se eus hon istor.

E barzh niverenn 84 Al Lanv (p. 22) e lennan, dindan bluenn L. Raoul :
"Ret eo eta ober hor mad eus an Istor tremenet evit diwall da adkouezhañ en hevelep gripedoù"
Ret mat eo avat. N'eus ken met ober...

RE: Gallaoeg, brezhoneg hag an dazont.
Gwenael, 2000-04-15 21:14:48

Tangi I.Strogell a skrivas:
-------------------------------
diwar-benn distagadur ar brezhoneg.
Re wir pezh a larez. Re a dud bremañ a gav dezhe n'eo ket pouezus strivañ a-benn distagañ ar brezhoneg en ur mod propik a-walc'h. Ur fazi bras eo. Ar soniadouriezh zu un deus perzhioù pennañ ur yezh. Dipitus e vezan alies o klevet tud ar rummad yaouank (bugale Diwan, lakomp) o tistagañ ar brezhoneg gant pouez-mouez ar galleg.
A galon ganit ha ga'r re all,
Gwenael

RE: Gallaoeg, brezhoneg hag an dazont.
sarah, 2000-04-24 22:58:40

Demat...Un tammig diwezhat on marteze evit kemer perzh, met pezh a lârit a santan tost ouzhin. Evit pezh a sell ar galloeg, em eus bet tro da c'houlenn, gant tud all, kentelioù a-berzh ar gevredigezh a ra ar muiañ evitañ : Kentelioù a zo bet paouezet goude teir c'hentel abalamour da gudennoù aozañ, pe arc'hant dreist-holl, daoust d'an deskarded bezañ 6. Komprenet 'meus e oa "intoks" pezh a lâred kement, e oa ar galloeg ur yezh gwir par da yezhoù all hag all. Arabat meskañ huñvreoù ha fedoù evel ma vez graet re alies en hon bed strizh a vrezhonegerien, da skouer. Ma ne fell ket d'ar re a gomz reiñ un tammig anezho o-unan a-benn deskiñ d'ar re all, ne dalv netra. Erfin, se n'eo nemet pezh 'meus gwelet me.
Diwar-benn Roparzh Hemon, Drezen hag all, anat eo n'int ket gwenn-gwenn, gouennelour tre zoken a-wechoù met goude bezañ bet labouret war o skridoù e welan dre vras n'oa ket kement-se o freder pennañ, an arz ne lavaran ket. Ret neuze barn an arz e-keñver an arzoù all ; an emzalc'h politikel e-keñver emzalc'hoù politikel all. N'eo ket evit difenn anezho e lâran se, yaouank on me ivez ha kentoc'h koul, ne ran ket a bolitikerezh. 'M eus aon e vez graet kalz a drouz war-dro se ha n'eo ket kement se ar gudenn donañ -diskar an emsav dre silañ sonjezonoù treuz e penn an dud, ne lâran ket. Met evel ma vez lâret alies, da bep hini da varn e-unan dre lenn pezh o deus skrivet ar re gozh.
Diwar-benn distagadur ar brezhoneg em eus traoù da lâret ivez. Me 'meus desket ar brezhoneg dre c'hoant sikour ar re a boanie evit difenn ur soñj a gaven reizh, hini gwir an dud da gomz en o yezvamm. N'on ket a vreizh, ha kalz a dud eveldon a zo, muioc'h-muiañ zoken. Den ebet eus ma familh ne gomz brezhoneg ha n'am bez ket tro da datouilhat gant tud all hep strivañ evit se. Eveljust ha gant ar vezh e komzan fall put gant an taol-mouezh spontus a vez ken rebechet deomp ma ne gredan ket komz peurliesañ. Pezh 'meus c'hoant da lâret eo n'eo ket reizh kement-se. An holl a zo laouen o welet penaos e kresk spontus niver an deskarded bep bloaz ha degemeret int mat tre. Met goude bezañ strivet bloavezhioù ha bloavezhioù, kredet kalz, roet kalz, evit ur bern tud e chomo dirouestl kudenn ar pouezh-mouezh. Petra 'vez kemennet deomp evit mont war-raok, estreget mont da gomz gant tud kozh (diaes evidomp tud yaouank, pa ne reomp ket en hon yezh deomp dija), pe mont da chom e-touez brezhonegerien a-vihanik. Ar re a zeu a-benn a zo rouez, ha n'eo ket da damall deomp d'am soñj. Marteze on nul evel ur bern tud all, met ur mare'oa ma oa kontant an dud kavout ac'hanomp evit kreskiñ ar sifroù. Ha muioc'h-mui e komprenan eo evel-se evit ur bern tud, evel tud bugale Diwan ne gomzont ket brezhoneg da skouer. 'Meus aon bezañ implijet evel dregantad ha n'eo ket bezañ doujet evel un hinienn. Tapout un taol-mouezh a-feson ne vez ket desket el levrioù, kemer a ra ur bern amzer. Arabat ankounac'hat an hent hon eus graet evit mont betek amañ ! Ha kement-se n'eo ket evit laret 'meus ket c'hoant deskiñ, met p'hon eus ur familh pe ur vicher n'eo ket en Emsav, n'eo ket ken aes ha se. A-wechoù en ur gomz gant tud all o deus graet ar memes hent egedon hon eus c'hoant paouez pep tra ha mont d'ober un dra all. Amañ eo graet ar jeu dija : ar vrezhonegerien a-vihanik o do ar plasoù gwellañ, hag a lako o familh da gentañ d'o heul, hag all hag all...Ma digarezit, n'on ket oc'h ober un "diwaskadenn", met an holl traoù-se a samm ma c'halon, ha daoust na vije ket komzet aliesoc'h eus se 'meus aon e vije ur bern tud eveldon. Petra 'soñjit ?
Spi 'meus e vin lennet ha komprenet
Kenavo 'benn nebeut -S.

RE: Gallaoeg, brezhoneg hag an dazont.
Yann-Fañch, 2000-04-25 18:48:06

Ne gredan ket ez eo ar brezhoneg ken diaes-se da zistagañ.
Ret eo heuliañ ar reolennoù diazez (taol-mouezh, hirder ha liv ar vogalennoù, mouezhiadur/divouezhiadur ar c'hensonennoù dibenn ger).
Evel-se e teuer a-benn da dapout un distagadur na vo ket peurvat marteze,
met a vo bepred kalz gwelloc'h eget hini ar galleg plaket war ar brezhoneg.

RE: Gallaoeg, brezhoneg hag an dazont.
Loig, 2000-05-02 19:05:28

Skriviñ a rez mat-tre, damezell!!

Un dra-rall meus da lâret oc'hpenn, d.b. ar skrivagnerion:
Gwir eo n'eo ket gwenn-kann tremened skrivagnerion'zo, marv pe vev. Ret eo barniñ anezhe èl ar pezh a veritont. Met ne faota ket meskiñ politikerezh ha lennegezh. da gentañ, ar mennozhioù politikel n'int ket berped pouezus e-barzh skridoù'zo, hag a-hend-arall, skrivagnerion èl Céline pe re-arall oa enepyuzeviourion spontus, met degemeret int èl skrivagnerion bouezus moñstra. Un dra-rall zo ivez: gwezhave ec'h eo 'kaoz d'o c'hudennoù-koustiañs m'o deus skrivet skrivagnerion'zo... Un den n'en deus kudenn erbet en e benn ne skriva ket. (Ar mennozh-sen a amprestan diget F.Favereau, ma c'helenner: hemañ d'eo ket faskour ha lâret'ra an traoù èl m'emaint).
Kudenn ar mare 'zo ivez. Da vare R.Hemon hag arall, hag a-raok ivez e oa pep hani, pe dost, met darn muiañ ag an dud d'an nebeutañ, enepyuzeviour pe gouennelour (?) h.a. Ha soñjal a rit e oa komunist Kervarker e-unan, en deus roet e anv d'al lec'hiad? Tamm; tu dehoù pellañ ha mirour ne lâran ket. El pep unan d'ar mare hag a-raok ivez. El just me n'on ket rasist na netra, hag amañ n'on ket é klask digarezioù da gonniri an dud. Met ret eo barniñ àr an tachennoù reizh, ha neket kemmeskiñ an holl. Ma vehe ret skarzhiñ pep arzour ha barzh ha skrivagner en doa mennozhioù iskis pe hegasus, soñj din ne chomhe ket kalz anezhe!!
Get ar rummad nevez e spian e varvey ar mennozhioù brein-sen, gwad nevez ganeoc'h-c'hwi, tud yeuvank (20 vlez meus, boñ...), ha netra spontus ken e penn an danvez skrivagnerion nevez!!
A galon

Loig ar Gwenedour

RE: Gallaoeg, brezhoneg hag an dazont.
Loig, 2000-05-02 18:42:33

Gwir eo rac'h an traoù a lârit aze!!Me meus aon ivez!! Klouskoude e vehe ret demp kaout fiañs e bugale Diwan, dreist pep hani 'rall (estreget ar re a zeska ar yezh get o zud, èljust, met ar re-mañ nend int ket niverus-tre...), peogwir e vint, a-benn nebeut, an dud nameite é ouiet koñz brezhoneg flour... Neuzen... Foutu-rac'h eo distagadur yac'h ar brezhoneg, m'hel lâra deoc'h... Met boñ, marsen ec'h eo ar priz da baeiñ a-benn ma chomey bev ar yezh...
Choajiñ etre an distagadur hag ar yezh a-bezh...

Loig ar Gwenedour

RE: Gallaoeg, brezhoneg hag an dazont.
Loig, 2000-05-02 18:43:41

RE: Gallaoeg, brezhoneg hag an dazont.
Yann-Fañch, 2000-04-24 23:35:57

D'am soñj e c'hell ar gallaoeg delc'her e blas a yezh a genlevenez, a genplijadur, bezañ ul liamm etre ar rummadoù.
Ur yezh dispar eo evit ar beilhadegoù, ar c'hontadennoù, ar farserezh.
Bez e c'hell ivez bezañ ur yezh skrivet evit an "taolioù pluenn", ur c'hazetennerezh tost d'an dud, hag evit skrivañ (treuzskivañ ?) kontadennoù, danevelloù, barzhonegoù.
Bez e c'hell ivez, evel just bezañ studiet ha desket er skol, er skolioù-meur.
Ne welan ket avat penaos e c'hellfe dont da vezañ ur yesh ofisiel, ur yezh skiantel pe velestradurel.
Evit se eo ar galleg "standard" stumm skivet ar yezh (evel an alamaneg evit an alsaseg).
D'am soñj eo tost a-walc'h stad ar gallaoeg ouzh hini ar pikardeg pe hini ar walloneg.

RE: Gallaoeg, brezhoneg hag an dazont.
Loig, 2000-05-04 18:26:28

Ur goulenn arall meus: heu aotroù Strogell, ha te'zo studier en Istoer er Sorbonne (ha donet'rez a Vodmeur...), pe studier e Roazhon 2 , DEUG 2 brezhoneg strollad 1 ?? Sur awalc'h on ec'h anavan ac'hanout!!

RE: Gallaoeg, brezhoneg hag an dazont.
Tangi I STROGELL, 2000-06-30 20:01:13

Arsav 'ta kamarad mat emañ ar gwir ganez met arabat eo dit mont d'embann ma anv gwir war ar groaz na d'ar seizh avel kennebeut.
Mezh ruz zo warnon peogwir n'am eus ket kavet amzer a-walc'h evit d'abuziñ anezhañ war ar web. Penaos 'mañ kont Loig.Ken ar c'hentañ

1999-2001

· apprendre
· aprender
· kenskriva
· learning
· geriaoui
· lernen

Abaoe 1995	Brezhoneg · Français · English · Español · Deutsch